खडकवासला येथे महाराष्ट्र नवनिर्माण सेनेचे अध्यक्ष राज ठाकरे यांनी उमेदवार मयुरेश वांजळे यांच्या प्रचारासाठी जाहीर सभा घेतली. या सभेत त्यांनी महाराष्ट्रातील विविध मुद्द्यांवर स्पष्ट व परखड मत मांडले. त्यांनी रमेश वांजळे यांचा उल्लेख करत मयुरेश वांजळेंना मत देणे म्हणजे रमेश वांजळेंना सन्मान देणे असल्याचे भावनिक शब्दांत व्यक्त केले.
राज ठाकरे खडकवासला प्रचार सभेत व्यक्त झालेले विचार
पुण्याच्या समस्यांवर खंत
राज ठाकरे यांनी पुण्यातील परिस्थितीबाबत तीव्र नाराजी व्यक्त केली. त्यांनी सांगितले की, पुण्यातील रस्ते, गटारे, आणि पाणी यासारख्या मूलभूत समस्यांवर अजूनही तोडगा काढला गेलेला नाही. “पुण्याचा झालेला सत्यानाश पाहून वाईट वाटतं, पण तुम्हाला त्याचं वाईट वाटत नाही,” असे त्यांनी सांगितले. त्यांनी लोकांना तांत्रिक प्रगतीची जाणीव करून दिली आणि आधुनिक महाराष्ट्र घडवण्याची गरज अधोरेखित केली.
छत्रपती शिवाजी महाराजांचा महाराष्ट्र विसरतोय का?
राज ठाकरे यांनी रायगडावरील छत्रपती शिवाजी महाराजांच्या समाधीच्या उभारणीच्या इतिहासावर भाष्य केले. “महात्मा ज्योतिबा फुले आणि लोकमान्य टिळकांनी समाधीच्या उभारणीसाठी समाजात एकजूट केली होती. आज मात्र आपण जातीपातींमध्ये अडकून राहिलो आहोत,” असे त्यांनी नमूद केले. ते म्हणाले की, महाराष्ट्राच्या वैभवशाली इतिहासाकडे दुर्लक्ष करून आज आपण चुकीच्या दिशेने जात आहोत.
आतंकवाद, भ्रष्टाचार आणि उदासीनता यावर टीका
“पुण्यात दहशतवादी पकडले जात असताना देखील लोक आणि नेते या विषयावर चकार शब्द काढत नाहीत. आमदार आणि खासदारांना फक्त टेंडरमध्ये रस आहे,” असे म्हणत त्यांनी राजकीय व्यवस्थेवर टीका केली. त्यांनी जातीपातींच्या राजकारणावरही भाष्य करत म्हटले की, “नेते लोकांना जातींच्या नावाखाली फसवतात.”
युवकांचे स्थलांतर: महाराष्ट्रासाठी गंभीर इशारा
राज ठाकरे यांनी महाराष्ट्रातील तरुण पीढीचा मुद्दा मांडला. “महाराष्ट्रातील अनेक तरुण बाहेरच्या देशात स्थायिक होत आहेत. शिक्षण आणि रोजगाराच्या संधी इथे उपलब्ध करून देता येऊ शकतात, पण यासाठी सत्तेत परिवर्तन आवश्यक आहे,” असे त्यांनी सांगितले. त्यांनी शिवाजी महाराजांच्या आदर्शांवर चालणाऱ्या महाराष्ट्राची गरज अधोरेखित केली.
मनसेचा जाहीरनामा आणि उद्धिष्ट
राज ठाकरे यांनी त्यांच्या पक्षाचा जाहीरनामा येत्या काही तासांत प्रकाशित होणार असल्याचे जाहीर केले. त्यामध्ये महाराष्ट्रातील समस्यांसाठी उपाययोजना मांडल्या असल्याचे त्यांनी सांगितले. शरद पवारांवर टीका करत त्यांनी विचारले की, “बारामतीसाठी उद्योग आणणाऱ्या पवारांनी महाराष्ट्रासाठी का आणले नाहीत?”
शेवटचा आवाहन: महाराष्ट्राचा गौरव परत मिळवा
सभेच्या शेवटी, राज ठाकरे यांनी उपस्थित जनतेला आवाहन केले की, “माझ्या सर्व उमेदवारांना प्रचंड मतांनी विजयी करून महाराष्ट्राला गतवैभव मिळवून देण्याची संधी द्या.” त्यांनी महाराष्ट्रासाठी भव्य स्वप्न उभारण्याचे वचन दिले आणि खडकवासला येथील जनतेला मतदानासाठी साद घातली.
राज ठाकरे यांच्या परखड विचारांमुळे खडकवासलामधील सभा चर्चेत आली. महाराष्ट्राच्या भल्यासाठी लोकांनी योग्य निर्णय घ्यावा अशी त्यांची अपेक्षा होती.
